IELTSની પરીક્ષા આપનારને ઓગસ્ટ મહિનાથી દરેક સેક્શનમાં ૬.૦ બેન્ડનો લઘુતમ સ્કોર મેળવવાની જરૂર નહીં રહે એવી માહિતી આઇડીપી એજ્યુકેશને આપી છે. સ્ટુડન્ટ ડાયરેક્ટ સ્ટ્રીમ કેટેગરી ફોર કેનેડિયન સ્ટડી હેઠળ અરજી કરનારને આ સુવિધા મળશે.
ઇમિગ્રેશન, રેફ્યુજિસ એન્ડ સિટિઝનશિપ કેનેડા (આઇઆરસીસી)એ IELTSમાં ફેરફાર કર્યા છે, જે ૧૦ ઓગસ્ટથી લાગુ થશે. આઇડીપી એજ્યુકેશનના રિજનલ ડિરેક્ટર (સાઉથ એશિયા અને મોરિશિયસ) પિયુષ કુમારે જણાવ્યું હતું કે, “આઇઆરસીસી દ્વારા કરાયેલા તાજેતરના ફેરફારને પગલે SDS પ્રોગ્રામ હેઠળ IELTSની પરીક્ષા માટે અરજી કરનારે હવે એકંદર ૬ બેન્ડનો સ્કોર મેળવવાનો રહેશે. દરેક સેક્શનમાં ૬.૦ બેન્ડનો લઘુતમ સ્કોર મેળવવાની જરૂર નહીં રહે.” તેમણે કહ્યું હતું કે, “આ ફેરફાર કેનેડામાં શિક્ષણ મેળવવા ઇચ્છછુક વિશ્વભરના વિદ્યાર્થીઓને વધુ તક પૂરી પાડશે.” વિદેશ જવા ઇચ્છુક વ્યક્તિ માટે IELTS ઇંગ્લેશ લેંગ્વેજની બહુ પ્રચલિત પરીક્ષા છે. દર વર્ષે ૩૦ લાખ લોકો આ પરીક્ષા આપે છે. વિશ્વની ૧૧,૦૦૦ કંપની, યુનિવર્સિટી, શાળાઓ અને ઇમિગ્રેશન સંસ્થાઓમાં તે સ્વીકાર્ય છે. ધ સ્ટુડન્ટ ડાયરેક્ટ સ્ટ્રીમ (એસડીએસ) સ્ટડી પરમિટ પ્રોસેસિંગ પ્રોગ્રામ છે. ખાસ કરીને કેનેડામાં અભ્યાસ કરવા ઇચ્છતા લોકોના ઝડપી પ્રોસેસિંગ માટે તેનો ઉપયોગ કરાય છે.
કેનેડાની સંસદીય સમિતિએ લગભગ ૭૦૦ ભારતીય વિદ્યાર્થીઓને પરત મોકલવાની કાર્યવાહી અટકાવવા સરહદી સેવા એજન્સીને વિનંતી કરવાની તરફેણમાં સર્વસંમતિથી મતદાન કર્યું છે. આ વિદ્યાર્થીઓને ભારતના ગેરકાયદે કન્સલ્ટન્ટ્સે છેતર્યા હતા. જેમાં મોટા ભાગના પંજાબના છે. સત્તાવાળાને તેમની શૈક્ષણિક સંસ્થાઓના ‘એડમિશન ઓફર લેટર’ ખોટા જણાયા પછી વિદ્યાર્થીઓને ભારત પરત મોકલવાની તૈયારી ચાલી રહી છે. ઇમિગ્રેશન સમિતિએ બુધવારે કેનેડા બોર્ડર સર્વિસિસ એજન્સી (સીબીએસએ)ને ભારતીય વિદ્યાર્થીઓનું ડિપોર્ટેશન અટકાવવાની તરફેણમાં મતદાન કર્યું હતું.
