તેમણે કહ્યું હતું કે ભારતીયો હવે ચીનને સૌથી મોટા સૈન્ય ખતરા તરીકે જુએ છે, પાકિસ્તાનને નહીં. તેમણે બેઈજિંગ સાથે રચનાત્મક રીતે પુનઃસંતુલન કરવાની જરૂરિયાત પર ભાર મૂક્યો હતો. ભારત અને ચીન વચ્ચેના સંબંધો મે 2020માં પૂર્વી લદ્દાખમાં લશ્કરી ગતિરોધ બાદથી વણસેલા છે. બંને દેશોએ તણાવને ઉકેલવા માટે ઉચ્ચ સ્તરીય સૈન્ય કમાન્ડર-સ્તરની વાટાઘાટોના 18 રાઉન્ડ યોજ્યા છે. ભારતે કહ્યું છે કે સરહદી વિસ્તારોમાં શાંતિ સ્થાપિત ન થાય ત્યાં સુધી ચીન સાથે તેના સંબંધો સામાન્ય નહીં થઈ શકે.
રો ખન્નાએ સ્ટેનફોર્ડની હૂવર ઈન્સ્ટિટ્યૂશન ખાતે વિદેશ નીતિ પર વક્તવ્ય આપ્યું હતું. આ દરમિયાન તેમણે કહ્યું હતું કે, ‘આજે આપણે ચીન સાથે રચનાત્મક રીતે ફરીથી સંતુલન બનાવવાની જરૂર છે. તેના માટે આપણને આપણા જોખમો અને એશિયામાં આપણા સહયોગીઓ વિશે સ્પષ્ટ રીતે ખબર હોવું જોઈએ પરંતુ અમે આશા રાખીએ છીએ કે આપણી કૂટનીતિ અને રાજનીતિ 21મી સદીને 20મી સદી કરતાં ઓછી લોહિયાળ બનાવી શકે છે.’
સાંસદે કહ્યું હતું કે ચીન સાથે રચનાત્મક રીતે પુનઃસંતુલિત કરવા માટે ચાર માર્ગદર્શક સિદ્ધાંતો છે. પ્રથમ- વેપાર ખાધ અને તણાવ ઘટાડવાનું આર્થિક આયોજન, બીજું- સંચારની ખુલ્લી ચેનલો, ત્રીજું- અસરકારક લશ્કરી અવરોધ અને ચોથું- આપણા એશિયન ભાગીદારો માટે આદર અને વિશ્વ સાથે મજબૂત આર્થિક ભાગીદારી. યુએસ હાઉસ ઓફ રિપ્રેઝન્ટેટિવ્સમાં સિલિકોન વેલીનું પ્રતિનિધિત્વ કરનારા 46 વર્ષીય ખન્નાએ કહ્યું હતું કે યુ.એસ.ને ભારત અને અન્ય એશિયન ભાગીદારો સાથે જોડાણ કરવાની જરૂર છે.
ખન્નાએ જણાવ્યું હતું કે, ‘અમારા ભાગીદારો એશિયામાં ચીનના વર્ચસ્વને રોકવા માટે સાથે મળીને કામ કરે તે સુનિશ્ચિત કરવા માટે જાપાન અને ઑસ્ટ્રેલિયાની સાથે ક્વાડમાં ભારતની ભાગીદારી મહત્વપૂર્ણ છે. 1950ના દાયકામાં ચીન અને ભારતે એશિયાને પશ્ચિમી સંસ્થાનવાદમાંથી ઉભરતા જોવાની સામાન્ય ઈચ્છા દર્શાવી હતી. પરંતુ ચીન સાથેના સહકારની નેહરુની દ્રષ્ટિ ખોટી પડી ગઈ હતી.’ ખન્નાએ કહ્યું હતું કે બીજા વિશ્વયુદ્ધ પછી પોતાના સંરક્ષણને બનાવવામાં ખચકાતા જાપાને પણ તેની રાષ્ટ્રીય સુરક્ષા સામગ્રીના નિર્માણમાં ઐતિહાસિક પગલાં લીધાં હતા.
